Kristianna W. Poulsen
Lesarabræv28. august 2019
Kristianna W. Poulsen

Viðlíkahald fyri C - vegakervið

Øll øki í landinum hava tørv á ábótum, og játtanin til viðlíkahald av vegakervinum skal raðfestast nógv hægri enn higartil.

Løgtingsval 2019

Gamaní skulu vit hava eitt vælútbygt vegakervi kring landið. Men vit skulu so sanniliga eisini finna neyðugar íløgur, so at okkara undirstøðukervi ikki fellur í órøkt.

Í samferðsluætlanini fyri 2018 til 2030 ger Landsverk millum annað vart við, at vegir og brúgvar treingja til viðlíkahald.

Játtanin til viðlíkahald av veganetinum er lutfalsliga nógv lækkað síðani 1996, tá játtanin var 2,3 prosent av samlaðu fíggjarlógini, meðan hon í 2018 var 0,9 prosent. Játtanin er bæði beinleiðis skorin og minkað orsakað av inflatión. Harafturat hevur ferðslan og slitið, sum fylgir við, verið vaksandi við yvir 30 prosentum tey seinastu 10 árini á ávísum teinum.

Síðani byrjanina av nítiárunum, tá játtanin til viðlíkahald av undirstøðukervinum varð nógv skerd orsakað av kreppuni, er hon ikki hækkað aftur. Øll øki í landinum hava tørv á ábótum, og játtanin til viðlíkahald av vegakervinum skal raðfestast nógv hægri enn higartil.  

Hesum vil eg arbeiða fyri, um eg fái møguleikan.

Kristianna Winther Poulsen, valevni fyri Javnaðarflokkin