Bjørg Dam
Lesarabræv21. august 2019
Bjørg Dam

Heimafriður er ein rættur, sum ikki er vunnin enn

Okkara stórsta inntøkukelda er ótolandi fyri nøkur teirra, ið búgva nærhendis ljóð- og roykdálkandi skipum.

Løgtingsval 2019

- Felagið heimafriður hevur gjørt vart við hetta í longri tíð. Nøkur reiðaríir hava víst atlit, sýnt samfelagssinni, og bøtt um ljóðdálkingina eitt nú við at ljóðbjálva motorin. Men sum heild er lítið og einki gjørt fyri at koma hesum trupulleikanum til lívs.

Felagið skipaði fyri góðum og kunnandi kjakfundi í Dansifrøi í gjárskvøldið, har ymsar loysnir vóru viðgjørdar. Sum limur í vinnunevndini í Tórshavnar kommunu, fyllir hetta málið sera nógv, tí ein loysn má finnast, sum kommurnar megna at fíggja, sum er rættvís fyri vinnuna, sum kann lata seg gera hjá SEV, og sum loysir ljóð- og roykdálkingina fyri borgarum okkara.

Vinnan tekur ikki atlit til borgaran, umhvørvið ella manningina umborð, tá skipini larma og dálka. Kommunurnar eru í kapping sínamillum um skipini, og vilja sjálvsagt verja sítt kappingarføri, tí kunna tær ikki av sínum eintingum seta hægri krøv enn hinar kommunurnar. Einasta loysnin er, at landið má traðka til og áseta somu mørk fyri dálking við kunngerð fyri allar kommunurnar.

Tíverri er tað so, at ikki øll í vinnuni av sínum eintingum vísa atlit og taka ábyrgd. Verða eingi krøv sett, verða tað tey í vinnuni, ið veruliga taka ábyrgd og gera íløgur í betrandi tiltøkum ella umhvørvisvinarligari skip, sum missa kappingarføri mótvegis teimum, ið dálka og larma. Tí má landið seta ein standard. 

Rættin til frið í egnum heimi er minsta krav borgarans, sum vit í Javnaðarflokkinum vilja arbeiða fyri. 

Bjørg Dam

Valevni Javnaðarfloksins