Øll skulu
við

Føroyar fyri øll – tí menniskjað er samfelagið

Føroyar eru í stórari menning. Men framgongd tryggjar ikki av sér sjálvum eitt land, sum hongur saman. Javnaðarflokkurin vil, at øll skulu við. Tí tá koma vit longst.

Bústaðarpolitikkur

Øll skulu hava ein tryggan gerandisdag og ráð til eitt heim

At skapa ein tryggan gerandisdag fyri øll krevur politisk átøk. Tað er alneyðugt. Tí fortreytin fyri allari menning er, at gerandisdagurin hongur saman, og at heimið er trygt.

Vit vilja:

byggja fleiri, smærri og bíligari bústaðir
lata leigustuðul, avmarka stutttíðarleigu og steðga spekulatiónini
siga nei til allar skatta- og avgjaldshækkingar á vanliga fólkið
skipa eina smidligari barsilsskipan við umsorgardøgum, einum virðiligum minstaútgjaldi, og einum nýggjum útgjaldi á 25.000 kr. til fyrsta barnið og 15.000 til tey, ið hava børn frammanundan

Í Føroyum skulu fólk hava ráð at liva og hava javnvág millum arbeiðs- og familjulív.

Í Føroyum er eitt trygt heim ein menniskjarættur.

Í Føroyum skulu øll hava eina trygga tilveru, og møguleikar at skapar sær eydnuna.

Tí skal gerandisdagurin hanga saman. Tað er drívmegin í okkara politikki.

Øll eru við til at skapa virðini. Tí skulu øll hava part av ágóðanum.

Tá ið tey sterkastu bera mest, kunnu vit saman lætta um hjá teimum, sum ikki orka so væl. Bara við at lyfta í felag, fáa vit øll við.

Ættarliðini undan okkum hava skapt eitt ríkt og trygt land. Tað er okkara skylda at lata somu gávu víðari til okkara eftirkomarar.

So komandi ættarlið eisini læra, at solidaritetur loysir seg - fyri øll.

Tryggur gerandisdagur

Almennu tølini vísa, at keypiorkan, sum minkaði nógv av inflatiónini og rentuhækkingum, er batnað aftur. Tað fegnast vit um.

Við Javnaðarflokkinum á odda hava lág- og miðallønt fingið fleiri lættar. Lægri skatt, og hægri barnafrádrátt og barsilsútgjald. Eisini er mvg tikið av útvaldum gerandisvørum. Og tey, sum arbeiða við røkt og umsorgan, hava fingið lønarlyft.

Tí tað var tiltrongt og neyðugt.

Vit vilja halda fram at lætta um gerandisdagin hjá vanligum fólki.

Vit vilja:

siga nei til allar skatta- og avgjaldshækkingar á vanliga fólkið. Heldur eiga vit at lætta um hjá hesum samfelagsbólkum, so hvørt tað er fíggjarliga ráðiligt.
gera barsilsskipanina smidligari, so foreldur sjálvi kunnu leggja til rættis og tryggja eitt virðiligt minsta útgjald
geva foreldrum rætt til 10 umsorganardagar at brúka, áðrenn børnini eru 7 ár
geva foreldrum eitt útgjald á 25.000 kr., tá tey fáa fyrsta barnið, og 15.000 kr., um tey hava børn frammanundan
virka fyri rættvísari sjúkradagskipan, so tímalønt verkafólk fáa sama rætt sum fastlønt
seta hol á arbeiðið at stytta arbeiðsvikuna
lata skattafrádrátt fyri limaskap í fakfelagi
styrkja rættarstøðuna hjá føroyskum brúkarum

At skapa ein tryggan gerandisdag fyri øll krevur politisk átøk. Tað er neyðugt. Tí fortreytin fyri allari menning er, at gerandisdagurin hongur saman.

Tað vilja vit tryggja - fyri øll.

Bústaðir, sum fólk hava ráð til

Í Javnaðarflokkinum eru vit sannførd um, at eitt heim er ein mannarættur.

Vit gleðast um, at fólkatalið veksur. Tíverri hevur bústaðarmarknaðurin ikki fylgt við eftirspurninginum. Hækkandi húsaprísir og óskipaður leigumarknaður forða nýggjum húskjum at skapa sær eitt heim at liva og hvíla í. Hetta er okkara allarstørsta avbjóðing.

Vit hava longu gjørt nógv fyri at fáa fleiri og fjølbroyttari bústaðir. Men nógv meira skal til, skulu vit nøkta stóra eftirspurningin.

Vit vilja:

víðka útboðið og byggja smærri og bíligari bústaðir, sum fólk kunnu rinda
fáa til vega fleiri almannagagnligar ungdóms- og eldrabústaðir
tillaga leigumarknaðin, so leigan ikki hækkar meira enn prísvøksturin
seta leigustuðul í verk
avmarka stutttíðarleigu
laga byggikunngerðina til føroysk viðurskifti
loyva kommunum partvíst at rinda fyri byggibúning
forða ótálmaðari spekulatión og kappbjóðing, tá ið hús verða seld

Ein rættvísari og betri skipaður bústaðarpolitikkur krevur samstarv við Bústaðir, kommunur og privatar byggiharrar. Bústaðaravbjóðingin verður ikki loyst við einstakari loysn, men við greiðari politiskari kós og langtíðarætlanum.

Arbeiðið er byrjað. Vit halda fram.

Okkara avrik

Vit hava lækkað skattin munandi fyri lág og miðallønt

Les meira

Ung & lesandi

Øll okkara ungu skulu hava eina framtíð í Føroyum

Vit missa í løtuni fimta hvørt ungfólk. Tað má gerast líka lokkandi at útbúgva seg her heima sum uttanlands – og at flyta heim aftur eftir lesnað.

Tað er gott, at ung fara burtur at lesa og læra. Men fleiri ung skulu velja Føroyar. Vit missa í løtuni fimta hvønn unga, tí tey festa røtur uttanlands. Tað er ikki haldført. Tað skal vera minst líka lokkandi at útbúgva seg her heima sum uttanlands - og at flyta heim aftur at byggja reiður og land.

Nógv er gjørt síðstu árini.

Vit hava hækkað lestrarstuðulin søguliga nógv við 1.000 skattafríum krónum um mánaðin fyri hægri lestur, galdandi frá komandi skúlaári. Stuðningurin er loksins komin upp á sama støði, sum tann danski, ið vit kappast við. Vit hava nú heimsins hægsta lestrarstuðul. Eitt stórmál, sum vit gleðast almikið um.

Eisini fáa lesandi nú løn undir útbúgving á heilsuskúlanum. Hetta fyri at lætta um hjá teimum, sum velja týðandi umsorganarøkið sum yrkisleið; eitt øki við støðugt vaksandi starvsfólkatørvi.

Og nú er verulig gongd sett á stóru kampusverkætlanina á Frælsinum í Havn, har eisini nýggjar lestraríbúðir verða tøkar heilt skjótt.

Alt hetta fegnast vit um. Men meira skal til.

Vit vilja:

koma skjótt á mál við kampusverkætlanini, so ungdómar kunnu velja eitt livandi og lokkandi lestrarumhvørvi á Setrinum
byggja fleiri lestraríbúðir um alt landið
økja um útboðið av útbúgvingum á Setrinum og á øðrum lærustovnum
geva fólki undir útbúgving sama skattafrádrátt sum í Danmark
styrkja møguleikarnar at vera skiftisnæmingur í øðrum londum
menna KT- og tøkniligar førleikar, eitt nú innan mál og vitlíki

Børn og ung – ein góð byrjan í lívinum

Børn og ung eru á stovni og skúla stóran part av barndóminum. Tá ið vit sum samfelag bjóða okkum at taka hond um dýrabarasta gullið hjá foreldrunum, skal tilboðið vera fyrstafloks. Altíð.

Málið er, at Føroyar skulu vera heimsins besta barnaland. Øll børn skulu hava dygdargóð og trygg tilboð - óansæð, hvørja bakgrund tey hava.

Fyrstu liviárini leggja grundina undir restina av lívinum. Øll átøk skulu setast í verk skjótt og tíðliga, so børn í váða verða loftað.

Í tøttum samstarvi við kommunurnar vilja vit virka fyri:

smærri barnabólkum
betri arbeiðsumstøðum fyri starvsfólk á dagstovnaøkinum, herundir normeringar, fyrireikingartíð og eftirútbúgving

Fólkaskúlin leggur lunnar undir menning landsins. Einki barn skal fara úr skúlanum uttan neyðugar førleikar at skapa sær eydnuna.

Vit vilja:

áhaldandi styrkja trivnaðin og arbeiðsumstøðurnar í skúlanum
hava fleiri lærarar fyri hvønn næming og betri fakligar umstøður
geva praktiskum og handaligum fakum størri rúmd
avtaka landsroyndirnar í verandi líki
seta aldursmark á 14 ár fyri sosialar miðlar

Børnini eiga framtíðina. Tað er okkara skylda at geva teimum gott í beinið.

Arbeiðið er byrjað. Vit halda fram!

Okkara avrik

MVG'frítøkur av gerandisvørum

Les meira

24. & 26. mars

Okkara valevni

Tvey val standa fyri framman og vit hava ein sterkan hóp, sum er klárur at lofta avbjóðingum – bæði her heima og á fólkatingi í Keypmannahavn

Løgtingsval 26. mars

Aksel V. Johannesen

Amanda E. Garðalíð

Ben Arabo

Bjarni Hammer

Bjørt Lind

Dagfinn Olsen

Djóni Nolsøe Joensen

Edith Dahl Jakobsen

Elin Hentze

Eyðgunn Samuelsen

Fróði Reinert Petersen

Gunnvá Tróndardóttir

Hans Jacob Thomsen

Helena F. Jørmundsson

Heri Wang Danielsen

Ivan Hentze Niclassen

Jákup á Dul Sørensen

Jóhanna Jancyardóttir

Jóhannis Joensen

Kristianna W. Poulsen

Laura Apol

Margit Stórá

Òlavur Nybo

Petur Simonsen

Regin Ejdesgaard

René K. Rasmussen

Sára Gullfoss

Sigrun Jónsveinsdóttir

Súsanna Bertholdsen

Fólkatingsval 24. mars

Sjúrður Skaale

Birna Heinesen

Artur Johansen

Heini S. Kristiansen

Kim Durhuus

Ólavur Larsen

Óli Jákup Jacobsen

Signhild V. Johannesen

Sólfríð B. Hammerfoss

Vælferð er ikki bara ein skipan — hon er eitt val. Eitt lyfti um tryggleika, samanhald og rættvísi. Fyri tey, sum tørva, og fyri tey, sum snáva. Tí øll menniskju skulu hava møguleika at fóta sær.

Hjálpin skal koma fyrr, so færri desta niðurímillum. Vit vilja arbeiða meira fyribyrgjandi; við skjótari hjálp og betri samanhang í tænastunum.

Børn við serligum tørvi og familjur teirra

Børn og ung sum líða, skulu hava skjóta, góða og samanhangandi hjálp. Vit vilja broyta fokus — frá diagnosum og útgreiningum til tørv.

Familjur skulu møta einari skipan, sum arbeiðir saman og setur barnið í miðdepilin.

Vit vilja:

stytta bíðitíðir til útgreining í barna- og ungdómspsykiatri
styrkja "lággáttartænastur" til børn, ung og familjur
halda fram við verkætlanini "Eitt gott lív á egnum beinum", so fleiri fáa hjálp fyrr
halda fram við "Barnaverkætlanini"
savna og styrkja samskiftisøkið í Føroyum, so fakligheitin verður sterkari, og tænastan meira samanhangandi
tryggja børnum og ungum við serligum tørvi dygdargóð og virðilig skúlatilboð

Góð og skjót heilsutænasta fyri øll

Heilsutænastan skal byggja á tørv, og ikki á, hvør hevur ráð at rinda. Fólk skulu hava hjálp, tá tørvur er á henni.

Vit hava sett nógv fleiri kommunulæknar í starv, og soleiðis hava øll í Føroyum egnan kommunulækna seinni í ár. Tað fegnast vit um.

Vit vilja:

stytta bíðitíðir — serliga fyri álvarsligar sjúkur og í psykiatriini
styrkja heilsutænasturnar kring landið
bjóða berarakanning fyri ávísar deyðiligar sjúkur til fólk millum 18 og 45 ár og makar hjá berarum
menna talgildar heilsuloysnir, sum kunnu lætta um viðtalur og ráðgeving

Sosial trygd og virðing – frá barnafamiljum til okkara eldru

Eingin skal verða settur uttan fyri. Øll hava rætt til virðing og tryggleika.

Vit vilja:

lyfta tey, sum bert hava fyritíðarpensjón ella fólkapensjón og samhaldsfasta at liva av
tryggja atkomuviðurskiftini í breiðastu merking
arbeiða eftir "Housing First-hugtakinum", har bústaður kemur fyrst, tá ið fólk koma í sosiala trongstøðu
síggja til, at fyritíðarpensjónistar í serligum førum kunnu varðveita part av barnastuðlinum eftir, at børnini eru fylt 18 ár
styrkja eldrarøktina og tryggja virðiliga umsorgan og dygd í tænastunum
hækka samsýningina at ansa eldri heima
geva avvarðandi umsorganardagar, so tey kunnu vera um eldri í familjuni

Rúsevni – fyribyrging og ábyrgd

Rúsevni oyðileggja lív. Vit góðtaka ikki, at kriminellir bólkar gera Føroyar til marknað fyri vandamikil rúsevni.

Vit vilja:

forða fyri, at rúsevni koma til landið
styrkja fyribyrging og kunning — serliga viðvíkjandi nýggj syntetisk evni
betra viðgerðartilboð og tryggja skjóta hjálp

Tá tú snávar, skalt tú kunna reisast aftur. Og tey, sum smugla og vinna pening úr vandamiklum rúsevni, skulu revsast hart.

Arbeiði og vinnulív

Øll skulu kunna arbeiða og reka vinnu. Løntakarar og vinna fíggja vælferðina. Tí skal vinnulívið vera sterkt, marknaðar-
atgongdin góð og treytirnar fyri íverksetar og smá vinnurekandi lagaligar.

Vit vilja:

styrkja virðisøkingina í Føroyum og geva íverksetum betri atgongd til váðafúsan kapital
menna nýggjar vinnur og arbeiðspláss innan tøkni, talgilding og burðadygga matvøruframleiðslu
smærri vinnurekandi skulu rinda lægri partafelagsskatt
skipa ein arbeiðsmarknaðardepil, har førleikamenning og vaksnamannalæra fer fram

Eitt gott og sterkt vinnulív er ein fortreyt fyri framgongd og vælferð í Føroyum. Tað er arbeiðið og førleikarnir hjá fólkinum og virksemið í vinnuni, sum skapa grundarlagið fyri vælferðarsamfelagnum.

Vit vilja skapa góðar umstøður fyri grøna orkuskiftinum, eisini fyri vinnuna. Virðini, sum verða skapt úr náttúrutilfeinginum, skulu í størri mun virkast her heima.

Arbeiðsmarknaður, førleikar og samstarv

Vit vilja hava ein arbeiðsmarknað, har virðisskapan, rættindi og samstarv fylgjast. Vit vilja skipa og styrkja samstarvið millum arbeiðsgevarar, fakfeløg og myndugleikar í sonevnt trípartasamstarv.

Vit vilja:

at yrkis- og handverkaraútbúgvingar skulu nøkta tørvin hjá vinnuni
styrkja vaksnamannalæru og lívlanga førleikamenning — bæði fyri løntakarar og sjálvstøðug
stovna arbeiðsmarknaðardepil, har førleikamenning og -meting, eins og vaksnamannalæra og líknandi fer fram
hava skipan við trípartasamstarvi, har myndugleikar, arbeiðsgevarar og -takarar gera langtíðaravtalur um týðandi samfelagsøki

Virðisskapan og nýggjar vinnur

Vit vilja arbeiða fyri betri marknaðaratgongd og sterkari kørmum fyri nýskapan, so føroyskar fyritøkur kunnu vaksa og skapa arbeiðspláss. Stórir møguleikar eru í mattilfeinginum á sjógvi og landi.

Vit vilja:

menna vinnur innan tøkni, talgilding og vitanartungar vinnur
seta meira ferð á burðardygga matvøruframleiðslu og virðisøking — ein matvørudepil skal samskipa menningina og nýskapanina
virka fyri, at almennar kantinur brúka fleiri stuttfluttar rávørur
beina burtur óneyðug krøv og gjøld, sum gera tað tyngri at reka vinnu
betra rættindini og atgongdina hjá einstaklingavirkjum og smáum fyritøkum til sosialar skipanir
framhaldandi menna ferðavinnuna, landbúnaðarferðavinnuna og aðrar tænasturvinnur
stimbra kreativar vinnur — eitt nú bókmentir, tónleik, film, sniðgeving og talgilda framleiðslu

Samhaldsfesti

Øll skulu hava gagn av menningini og merkja savningarmegina

Menning og tilflyting hanga saman. Men stóra framgongdin bjóðar samstundis savningarmegini av, tí ikki øll kunnu taka lut. Summi enda uttanfyri felagsskapin.

Vit vilja:

fara undir Suðuroyartunnil, um tað er fíggjarliga ráðiligt
endurskoða Fast Track-skipanina og seta krøv um reina revsiváttan fyri at fáa arbeiðsloyvi
herða treytirnar, so tað sum útgangsstøði ikki skal bera til at fáa familjuna við, tá tú kemur til Føroya at arbeiða við arbeiðsloyvi
styrkja føroyskt sum annaðmál kring landið. Laga undirvísingina til, so hon kann sameinast við arbeiði

Vøkstur og tilflyting hava givið stóra framgongd, men bjóða samstundis savningarmegini av. Ikki øll hava fingið eins stóran lut í menningini. Skal landið hanga saman, mugu vit tryggja javnbjóðis møguleikar — sosialt og landafrøðiliga.

Fast samband til Suðuroyar er ein fortreyt fyri, at suðuroyingar eisini kenna seg sum part av landinum og fáa størri lut í framgongdini. Menningin má fevna um alt landið.

Vit vilja:

bora Suðuroyartunnil, um tað er fíggjarliga ráðiligt
gera eina ætlan fyri komandi tunnlar, byrgingar og brýr, har Tjørnuvíkartunnilin og byrgingin um Haraldsund liggja fremst fyri
leggja ætlan fyri dagføring av strandferðsluflotanum
styrkja samferðsluna kring alt landið, eisini við álítandi almennum bygdaleiðum
seta enn fleiri pengar av til viðlíkahald av almennum bygningum og landsvegakervinum
menna talgilda infrakervið, so øll hava gott netsamband, og fólk kunnu arbeiða og brúka vælferðartænastur kring alt landið — eisini heimanífrá

Integratión – rættindi, skyldur og ábyrgd

Seinastu árini er tilflytingin vaksin nógv. Tað hevur styrkt vinnuliga virksemið og givið týðandi, nýggj íkast til landið. Tað fegnast vit um. Men stór og skjót tilflyting leggur trýst á almennu tænasturnar. Vit skulu hava ein ábyrgdarfullan útlendingapolitikk, sum bæði er rættvísur og sosialur.

Vit vilja:

endurskoða Fast Track-skipanina — hon skal vera smidlig, men samstundis avmarkast
herða treytirnar fyri familju-sameinað við arbeiðsloyvishavarar
seta krøv um reina revsiváttan fyri at fáa arbeiðsloyvi
styrkja eftirlitið við arbeiðsumstøðum og lønarviðurskiftum — í tøttum samstarvi við fakfeløgini
áseta greiðari ábyrgd hjá arbeiðsgevarum, tá ið arbeiðsloyvi verða latin og tá hesi ganga út
styrkja føroyskt sum annaðmál kring landið og laga undirvísingina til, so hon kann sameinast við arbeiði
menna møguleikar fyri talgildari málundirvísing

Mentan, list og ítróttur – tað, sum lyftir okkum

Mentanin gevur okkum felagsskap, samleika og rødd. Hon skapar lív kring landið og styrkir savningarmegina í Føroyum. Mentan og list skulu vera fyri øll — ikki bara fyri tey fáu.

Vit vilja:

hækka játtanina til Mentanargrunnin og tryggja yrkislistafólki betri arbeiðskor
tryggja øllum børnum regluligar mentanarupplivingar í dagstovnum og skúlum
lata kringvarpssavnið upp fyri øllum føroyingum
broyta miðlastuðulsskipanina, so privatir miðlar hava lív lagað
styrkja ítróttarlívið í samstarvi við ítróttarsambondini
menna eina einfalda almenna skipan til limarøkt og limagjald

Mentan og felagsskapir byggja brýr. Við at satsa upp á mentan, list og ítrótt, menna vit trivnað og felagsskap.

Ábyrgd fyri framtíðini

Øll skulu gera sítt fyri at taka ábyrgd av framtíðini

Búskapurin má vera haldførur; tey ríkastu mugu rinda mest og almenni raksturin skal vera skynsamur. Vit mugu finna felags loysnir. Vit taka ábyrgd, men vit taka eisini atlit.

Vit vilja:

lata breiðu herðarnar bera mest við stigvísum partafelagsskatti – og vinnur, sum hava framíhjárættindi at troyta náttúrutilfeingi, mugu rinda meira til felagsskapin
gera almenna raksturin einfaldari
fáa ferð á grøna orkuskiftið og gera Føroyar meira sjálvbjargnar við orku
arbeiða fyri fleiri uttanríkispolitiskum heimildum og betri handilsavtalum

Vit mugu tryggja ein haldføran búskap, har teir breiðastu herðarnar bera meira. Samstundis skulu vit hava ein einfaldan og skynsaman almennan rakstur, har vit handfara fólksins pening við størstu virðing.

Ábyrgd merkir, at vit taka avgerðir, sum bæði gagna nútíðini og sum tryggja tilverugrundarlagið hjá komandi ættarliðum.

Haldførur búskapur

Haldførur búskapur er bulurin í vælferðarsamfelagnum. Inntøkur og útreiðslurnar skulu sjálvandi javnviga. Seinastu árini hava vit tikið neyðug tøk — almenni raksturin er tillagaður, og útreiðsluvøksturin hevur verið søguliga lágur. Men meira skal gerast.

Vit vilja:

føra ein haldføran fíggjarpolitikk við lágum almennum rakstrarvøkstri
gera almenna raksturin einfaldari og skynsamari
arbeiða fyri sterkari samstarvi millum kommunurnar, sum kann føra til færri og sterkari kommunur
seta í verk ein rættvísari og stigvísan partafelagsskatt, har størstu fyritøkurnar rinda meira, meðan smá vinnurekandi rinda minni
at vinnur, sum hava framíhjárættindi at troyta náttúrutilfeingi, skulu rinda meira til felagsskapin
ikki lækka ríkisveitingina ella yvirtaka kostnaðarmikil økir, meðan hall er á fíggjarlógini

Um pensjón vilja vit:

hava eina smidligari pensjónsskipan — øll kunnu ikki at arbeiða líka leingi, og niðurslitin skulu sjálvandi sleppa frá fyrr
lata upp fyri, at onnur fara frá so líðandi, so yvirgongdin frá arbeiði til pensjón verður smidligari
eggja til, at fleiri taka eitt eyka tak á arbeiðsmarknaðinum

Náttúran, grundarlagið undir vælferðini

Vit liva av, í og við náttúruni. Tí er tað av stórum týdningi, at vit virða og verja náttúruna. Vit hava samtykt Náttúruverndarlógina og stovnað náttúrufyrisitingina.

Vit vilja:

skipa verndarøki um alt landið, har tørvur er á tí
halda fram at styrkja náttúrufyrisitingina
flyta avgerðarmyndugleikan frá Yvirfriðingarnevndini til náttúrufyrisitingina
nýta náttúrutilfeingið skynsamt við nýggjari skipan fyri burturkastøkið
varðveita og styrkja lívmargfeldi

Øll skulu við í grøna orkuskiftið

Veðurlagsbroytingarnar eru ein verulig avbjóðing fyri náttúru, vinnu og samfelag. Stevnan er greið: Føroyar skulu skjótast gjørligt gerast leysar av jarðrunnum brennievnum. Orkuskiftið skal vera rættvíst — familjur við lágum og miðalinntøkum skulu við.

Vit vilja:

seta ferð á aftur útbyggingina av vindorku og aðrari varandi orku
tryggja, at eisini húski við lágum inntøkum kunnu vera við í orkuskiftinum
siga nei til, at elbrúkarin og húskini fáa fleiri byrðar at bera
laga stuðulsskipanirnar til, so tær hjálpa teimum, sum annars ikki hava ráð til grønar íløgur
samtykkja eina lóg á veðurlagsøkinum við realistiskum málum fyri minking av útláti
tryggja gjøgnumskygni í orkukostnaðum og prísskipanum

Ein dagførdur ríkjafelagsskapur

Javnaðarflokkurin er ein samríkjaflokkur. Vit vilja framvegis hava ein sterkan og tryggan felagsskap við Danmark. Men felagsskapurin má mennast við tíðini — karmarnir eru nú vorðnir ov trongir.

Vit vilja arbeiða fyri at dagføra felagsskapin við Danmark, so vit fáa ein nýggjan ríkjafelagsskap millum javnsett lond — sum gevur Føroyum fleiri uttanríkispolitiskar heimildir og styrkir okkara búskaparligu og altjóða støðu.

Vit vilja:

dagføra felagsskapin við Danmark, so tað verður ein ríkjafelagsskapur millum javnsett lond
hava betri marknaðaratgongd í Asia, Suðuramerika og USA
arbeiða fyri at fáa fríhandilsavtalu við ES og Bretland
staðfesta føroyska limaskapin í WTO
vinna Føroyum sjálvstøðugan limaskap í IOC
hava sjálvstøðugan limaskap í Norðurlandaráðnum

Øll skuluvið

Øll skulu hava ein tryggan gerandisdag og ráð til eitt heim

Tryggur gerandisdagur

Bústaðir, sum fólk hava ráð til

Vit hava lækkað skattin munandi fyri lág og miðallønt

Øll okkara ungu skulu hava eina framtíð í Føroyum

Børn og ung – ein góð byrjan í lívinum

MVG'frítøkur av gerandisvørum

Okkara valevni

Øll skulu verða loftað, tá ið lívið gerst torført

Børn við serligum tørvi og familjur teirra

Góð og skjót heilsutænasta fyri øll

Sosial trygd og virðing – frá barnafamiljum til okkara eldru

Rúsevni – fyribyrging og ábyrgd

Arbeiðsmarknaður, førleikar og samstarv

Virðisskapan og nýggjar vinnur

Øll skulu hava gagn av menningini og merkja savningarmegina

Integratión – rættindi, skyldur og ábyrgd

Mentan, list og ítróttur – tað, sum lyftir okkum

Øll skulu gera sítt fyri at taka ábyrgd av framtíðini

Haldførur búskapur

Náttúran, grundarlagið undir vælferðini

Øll skulu við í grøna orkuskiftið

Ein dagførdur ríkjafelagsskapur

Øll skulu við

Okkara avrik

Øll skulu
við